Jakob Balde, 1636

Über den trügerischen Schein der Welt

Hecatombe seu Ode nova de vanitate mvndi

(München 1636) von Jakob Balde

Sich/ wie der gantz Erdenkraiß
Erschittlet werdt/ vnd spalte: (... gspalten)
Die kugel bricht/ fehlt noch ein kleins/
Kan sich kaum lenger halten.
Aller Veralt/ vnd Vngestalt/ (Voller Alter ...)
Wirdt wol kein Himmel tratzen. (keinem ... trotzen)
O! Welt wisch auff/ es steth dir drauff
Der Letzte halbe Batzen.

Es wüten die vier Element/
Will eins das ander tödten.
Jm Wasser hat das Fewr sein End;
Fewr will das Wasser nöthen. (... nötigen)
Nit anderst als wanns vmb den Halß
Vnd Ohren Lärmen schlügen. (Lärm schlagen)
Mit solchem Grimm/ gantz vngestim/
Thuns gegenander kriegen.

Wach auff mein Sel/ mein Seel wach auff/
Wilst disem Krieg entrinnen:
Mit Taubenflüglen thu dich nauff
Weit von der Erden schwingen.
Wo schnell vnd bhendt das Firmament
Vmbgweltzt die Nacht verkündet:
Wo bey der Waag den schönsten Tag
Ein Jungfraw angezündet.

(Sternbild Waage = herbstliche Tag- und Nacht-Gleiche,
und natürlich ist hier auch das Erscheinen von Jesus auf der Welt gemeint,
von Maria hat Balde ja immer ganz besonders geschwärmt!)

Dort ist das Schloß Sion genannt/
Hierusalem voll Gaben:
Ein Reich gericht im besten Standt/ (eingerichtet)
Kein Endt wirdts jemal haben.
Wächter stehn für/ gleich bey der Thür/
Damit kein Stund nein wischt: (... hineinschlüpft)
December nauß/ Hornung bleib drauß
Mit deinen faulen Fischen. (Ausreden, Lügen, Sternzeichen Fische)

Kein Attila, kein Schwed kombt her/
Der zornig Trummel rühret:
Vnd was da seyndt für Wandaler/
Wie Lämblein man sie führet.
Mörder/ blutschlauch/ gantz wild vnd rauch/ (Blutsauger, rauchende!)
Keck vber alle Wunder;
Kriegsgurglen/ thier auff allen vier/
Die ghören all hinunder.

Die Ewigkeit geht auß vnd ein/
Rund vmb die Statt spatzieren.
Da ist kein zanck/ kein Mein/ kein Dein.
Ein Cron kan alle zieren. (Heiligenschein)
Ein Saal darin/ den Seraphin
Vnd Cherubin vmbgeben.
Mit einem Wort/ in disem Ort
Jst Amen gut zu leben.

Der schön da ist/ bleibt allzeit schön/
Laßt nur sein Früling walten.
Keim Alten fallen auß die Zähn/
Dort grünens erst die Alten.
Sie frewen sich/ frey sicherlich/
Vnd förchten gantz kein schmertzen.
Ohn vnderschid/ ist lauter Frid/
Mars dörfft hie gar nit schertzen.

Sey er so keck/ fang Händel an/ (er = Mars)
Laß heimlich Fewr einlegen:
Kein Gwalt die Vestung gwinnen kan/
Breda ist nichts dargegen.
Keim andern nit/ auff keinsen Bitt/
Thut man die Pfort auffschliessen
Seligen hie verlieren nie
Die Güter/ der sie gniessen.

Das einig Gut/ das wahre Gut/ (einzig)
Das beste Gut zudencken/
Sich wie ein Meer außgiessen thut/
Vnd reine Hertzen trencken.
Ein Meer sag ich/ süß über Milch/ (süßer als Milch)
Süß über süß vor Frewden:
O! wol dem/ der in disem Meer
Wirdt gar ein Schiffbruch leyden.

Es wirdt die Sonn allhie zu Land/ (überall Hierzulande)
Das Liecht der Glori gnennet.
Das schönste Angsicht der Verstand/
Jn disem Liecht erkennet.
Was tunckel war/ wirdt alles klar/
Weit über dMorgenröthe.
Das kleinste Kind/ das dort sich findt/
Waißt mehr als all Propheten.

Die höchste Gstirn/ die vmher gohn/ (gohn, gahn)
Ligen bey jhren Füssen.
Seyndt jhren Herrn vnderthon/
Müssens all Morgen grüssen.
Sitsam/ barhaupt/ seins Gwalt beraupt
Steht Iuppiter von ferrne.
Wann er nit holdt/ vil donnern wolt/
Jch main/ man wurd jhn lernen.

Auff Erden schlag er dapffer drein/
Dort wirdts jhm niemand wehren.
Werff Ætnam ein/ es kan wol sein:
Die Berg mag er vmbkehren.(Jupiter hat mit Bergen geworfen)
Stral/ wolckenplitz/ vnd hagelgschitz.
Sehr hart die Felsen klagen:
Wie jämmerns nit! wie brumblens mit! (mitdröhnen)
So offt jhr Buckel gschlagen. (vom Gewitter)

Der gfahren steht ein gantzes Heer
Mit auffgespanten Hanen.
So vil Sand Körnlein in dem Meer/
Deß will ich dich ermahnen.
Mach nur bald füß/ es thut gar spieß
Vnd helleparten regnen.
Du bist im stich/ vnd trifft man dich/ (in Stichnähe des Feindes)
Kanst dir das Bad selbst gsegnen.

Von so vil Sig Cupido stoltz/
Ein Daußes über dmassen: (ein listiger, verschlagener Mensch)
Schiest öffter ein vergifften Poltz (Bolzen)
Durch alle Weeg vnd Gassen.
Du wirst berührt/ vnd gar verführt/
Vnd liebst das was vergifftet.
Zit morgens nagt das gwissn/ vnd sagt/
O Gott! was hab ich gstifftet? (angestiftet)

Jst noch nit gnug/ merck auff den Tisch/ (paß auf ...)
Was man für Richten schicke. (Gerichte, Speisen)
Jn knödlen/ nudlen/ fleisch/ vnd fisch/
Kanst deinen Todt nein schlicken. (hineinschlucken)
Vom besten Wein kanst truncken sein/
Drauff dStiegen aberfallen.
Für solchen Most der so vil kost/
Wünscht ich ein Wasserschnallen. (Wassersuppe)

Vnd aber du zechst nur deß baß (... umso mehr)
Auff bidten vnd auff borgen.
Sauffts Negelwein/ vnd Hippocras,
Vnd laßt gut Vöglein sorgen.
Als wann kein Gott/ die Höll/ der Todt/
Der Himmel nur erdichtet:
Vnd wäre schon der Bottenlohn
Mit dantzen außgerichtet.

Tragt auff/ sprichst du/ vnd zettet nit/ (fallen lassen und verstreuen)
Rebhüner vnd Basteten.
Credentz die wirdt alls vberschitt:
Drauff schlagt die Harpff moteten.
Bist guter ding/ thust hohe spring/
Jetz diß/ jetz das begehren.
Vnd mainst Herr Wirth vergeß der jrt: (... die Zeche)
Die Welt soll ewig weren.

Weit anderst klingt/ was hell vnd klar
Paulus hat außgesprochen.
Die Welt zergeht mit Haut vnd Haar/
Was darff es jetz vil bochen?
Hast ghört den klang. der Welt anhang
Zergeht: sie ist betrogen.
Die schlimme Welt/ wems jmmer gfellt/
Verstuncken vnd verlogen.

Man waint vnd singt diß zfeld vnnd zhauß/
Man schreibt darvon eins schreiben.
Schreib hin/ schreib her/ man lacht dich auß/
Vnd laßts beym nechsten bleiben;
Nach Vppigkeit vnd Eytelkeit
Thut Gold vnd Silber lauffen:
Die Ewigkeit vnd Seeligkeit
O schand! will niemandt kauffen.

E N D E.